أثارت صورة نجم الأهلى المنتقل حديثاً لنادى ستوك سيتى الإنجليزى رمضان صبحى داخل السفارة البريطانية برفقة أحد الموظفين بالسفارة والذى كان يرتدى فانلة نادى الزمالك تساؤلات عديدة.
المسئول الزملكاوى الذى كان بجوار رمضان صبحى هو”الأمير عثمان” المستشار الإعلامى للسفارة البريطانية بالقاهرة،وهو يعشق نادى الزمالك بجنون نظراً لإنتماء عائلته بالكامل للنادى الأبيض.
الأمير عثمان كتب على صفحته على الفيس بوك تفاصيل ظهوره بفانلة الزمالك قائلاً:
توضيح بخصوص صورتي بفانلة الزمالك مع النجم رمضان صبحي
أولا:أنا سعيد جدا إن رمضان ربنا وفقه و احترف لأنه لاعب موهوب و هيفيد المنتخب الوطني و هو إنسان مهذب.
ثانيا:أنا زمالكاوي من عائلة زمالكاوية و فخور بتشجيع نادي الزمالك و اتصورت مع رمضان بتيشيرت الزمالك لإثبات إن الزمالكاوية مش بيتقمصوا ولا حاجة و لكن احنا بنحب الكورة الحلوة لأن دي جينات الزمالك و الزمالكاوية و اسألوا الإمبراطور حازم إمام و الحاوي أيمن حفني و الكابتن حمادة عبد اللطيف و محمد صبري و غيرهم نجوم كبار.
ثالثا:أنا دوري كمسؤول إعلامي في السفارة البريطانية هو تعزيز الروابط بين الشعبين البريطاني و المصري. و احنا في السفارة عندنا زمالكاوية كتير و أهلاوية كمان و السفير بيشجع نادي الاتحاد السكندري.
رابعا:احنا كنّا مبسوطين بوجود رمضان معانا النهاردة و معظم اللي في الصور معاه زمالكاوية و قالوا لرمضان كدة و هما بيتصوروا معاه و الراجل ابتسم و تقبل الموضوع و كان صدره رحب
خامسا:ربنا يوفق كل اللعيبة اللي بيلعبوا كورة حلوة و يجعلنا دايما سبب في خدمة و قضاء حوائج الناس
