قال الرئيس عبد الفتاح السيسي، اليوم الأربعاء، خلال افتتاح مجمع مصانع الرمال السوداء في مدينة البرلس بمحافظة كفر الشيخ، إن دراسات جدوى مشروع «الشركة المصرية للرمال السوداء» استغرقت 3 سنوات.
وأكد الرئيس أن المشروع متاح أمام شركات القطاع الخاص، مضيفا أن طلب السوق العالمية للمعادن المنتجة من الرمال السوداء مرتفع جدا.
وتابع «الحكاية دي بدأت امتى؟ بداية اكتشاف الموضوع في مصر من 80 سنة، ولما اتكلمنا في الموضوع ده من 5 سنين محدش شجعنا، لأن دراسات الجدوى خدت 3 سنين، طب اشرح للناس عشان الناس يمكن تكون أول مرة تسمع إن فيه في مصر رمال سوداء».
وأردف السيسي «أنا بشكرك يا دكتور حامد- يقصد هنا الدكتور حامد ميره، رئيس هيئة المواد النووية- وعايز أطمن الناس على الوضع البيئي، ولو انتوا شايفين إن انتوا محتاجين مواد يرتديها العمال، نجيبها، عشان نكون مطمنين ومتحوطين أكتر، دول أهلنا، عايزين نطمن إن الشغل ده ملوش تأثير على الإنسان».
وأوضح الرئيس السيسي: يتبقى شيء عايز أقوله للمشروع ده، انتظرنا المشروع ده كتير أوي وكنا متابعين عشان المعدات تيجي أكتر من 3 سنين، أنا بكلم القطاع الخاص، وبكلم الشركات اللي اشتغلت معانا زي حسن علام، بقولكم انتوا عرفتم المسار».
وتابع الرئيس: «السؤال؛ حجم الطلب أد إيه؟ وحجم الاحتياطي أد إيه؟ السؤال كنت بقوله وبسمعه للقطاع الخاص، من أول المشروع ده متاح تدخلوا فيه، أيوه، اللي عايز يتفضل، تقولي طب مدتناش الفرصة ليه من الأول؟ الفرصة موجودة من سنين كتير أوي، هقول مجاش فرصة المشروع يتعمل ومحصلش، الفرصة جت إن فيه مسار نجحنا فيه وعرفنا تفاصيله وفيه حاجة اتشكلت، الإجابة اللي انتوا عايزين تسمعوه، بقول كلامي للي عايز يدخل، دراسات الجدوى تخليك تدخل وانت مستريح، وطلب السوق، يلبي أي منتج انت بتطلعه، يتبقى جزء القيمة المضافة، فيه خامات ملهاش وفيه خامات تقدر تطلع منها هنا في مصر، بقول عشان البيانات الموجودة عندنا لكل المعني بهذا الأمر».
وأكمل «البيانات متاحة للكل للي عايز يشتغل، قلت السؤال وإجابته، قلت هل الاحتياطي الموجود تكفي الطلب؟ اه.. يبقى فاضل نعمل المشروع. مقولتش الدولة، بقول القطاع الخاص، بقول كده عشان فيه فرصة على ضوء المؤكد دلوقتي. شغالين هل فيه فرصة تانية، زي ما قلتوا بحيرة ناصر وبرنيس، نقدر نعمل مصنع واتنين وتلاتة، والقطاع الخاص يخش في شراكة، المشروع ده تقريبا 200 مليون دولار تقريبا، كل المنتج اللي بيطلع من هنا بيطلع بالعملة الصعبة».
واستطرد الرئيس عبد الفتاح السيسي قائلا «بقول للقطاع الخاص شكل مجموعات متوافقة مع بعضها. انتوا بتشتغلوا مع بعض، بقول يتعمل كيان بـ25 أو 30 مليار جنيه، بتدفقات مالية هيكون عندنا مصنعين تلاتة».
وتابع: «أنا مش أول مرة أسمع الموضوع دلوقتي، اه أول مرة تشوفونا هنا. الموضوع متابع بدقة، ده جنب ده جنب ده، البلد تعمل حاجة وتتقدم للأمام».
وأضاف: «بشكر القائمين على المشروع، وكل اللي شاركوا، وبشكر الدكتور محمد شاكر وزير الكهرباء. دايما الخير معاه، أول مرة نقدم على خطوة في هذا المجال في مصر. وبالتالي هتبقوا رواد في هذا العمل وإن شاء الله نفتتح مجمعات. في النهاية بنشغل ناس ونجيب عوايد من عملة حرة ونوفر فلوس كنا بنشتري».
افتتاح مشروع مجمع الرمال السوداء
افتتح الرئيس عبد الفتاح السيسي، في وقت سابق اليوم الأربعاء، مصنع الرمال السوداء بمدينة البرلس بمحافظة كفر الشيخ.
وصرح المتحدث الرسمي باسم رئاسة الجمهورية، السفير بسام راضي. أن مصنع الرمال السوداء بكفر الشيخ هو الأحدث من نوعه على مستوى العالم. باستخدام تكنولوجيا التعدين المتطورة. ويعتبر إضافة جديدة لسلسلة المشروعات القومية الكبرى التي تهدف إلى تعظيم الاستفادة والاستغلال الأمثل لموارد مصر الطبيعية.
وأضاف السفير «راضي» أن هذه المشروعات تحقيق القيمة المضافة للمعادن المستخلصة من الرمال السوداء، التي تستخدم في العديد من الصناعات الدقيقة مما يفتح الآفاق لاستثمارات جديدة تدعم الاقتصاد الوطني وعملية التنمية الشاملة.
اشترك في حسابنا على فيسبوك و تويتر لمتابعة أهم الأخبار المحلية
