سارة أسامة تكتب: قادر تكمل برغم كل الضغوط؟

إنك في عز ضيقك أو وجعك مايبانش عليك وقادر تتعامل عادي  وتنجز اللي وراك وتتفاعل بهدوء وبثبات ..

فده مش حاجه عادية ولا حصلت صدفة !

ده تراكمات ترويض لنفسك ..

تراكمات وصل مع ربنا ..

تراكمات فهم لحقايق ..

حقايق عن طبيعة الدنيا ، عن قدرات الله ، عن أصل معنى

لاحول ولا قوة إلا بالله ..

الوضع ده هو التطبيق العملي ( للصبر ) ..

العلماء اتكلموا عن أهم علامات الصبر:« ثبات الحال رغم تغير الأحوال ».

يعني بشكل عام ، سعيك مستمر ، وقادر تكمل ، برغم اختلاف الأحوال برغم وجعك منها برغم ضيقك أو حزنك .

الناس دي ربنا نزل فيهم آية :«الَّذِينَ اسْتَجَابُوا لِلَّهِ وَالرَّسُولِ مِن بَعْدِ مَا أَصَابَهُمُ الْقَرْحُ ۚ لِلَّذِينَ أَحْسَنُوا مِنْهُمْ وَاتَّقَوْا أَجْرٌ عَظِيمٌ ».

القرح هو شدة الحزن والهَم ..

فاللي مكمل في سعيه ، هو شخص قدر يلبي إستجابة الله ورسوله ..

والاستجابة درجات حسب كل واحد وقدراته ..«لِلَّذِينَ أَحْسَنُوا مِنْهُمْ وَاتَّقَوْا أَجْرٌ عَظِيمٌ».

كل ما استعنت بالله وقاومت أكتر وكملت في مسيرتك ، كان أجرك عظيم .. وربنا ماذكرش الأجر عبارة عن إيه لكنه «عظيم» .

فلو إنت من الناس دي .. مكمل برغم كل أوجاعك والضغوط اللي جواك ، بتقوم تاني ، بتحاول تحافظ على ابتسامتك وعطاءك وسعيك ووصلك بالله برغم الظروف ..

فإنت من القلة اللي ربنا اتكلم عنهم ، اللي طبقوا معاني الصبر والتسليم والإيمان الحقيقي  ..«وَمَا يُؤْمِنُ أَكْثَرُهُم بِاللَّهِ إِلَّا وَهُم مُّشْرِكُونَ ».

المعنى ده الرسول  ﷺ وصانا  نتدرب عليه ، بتوصيته بإننا نفَعل مظاهر الفرح في (العيد) ،  بالتواصل ، باللبس الجديد ، بالإطعام  ..

فكرة الإندماج وإنك تبذل في إنك تحاول تِفرح وتفَرح اللي حواليك ، حتى لو ده الظاهر ، لكن كل ده هينعكس على قلبك وروحك بالسكينة والطمأنينة ، فده من تعاليم الرسول لترويض نفوسنا وتزكيتها .

وبشكل عام ، فيه وصية مهمة أقرها سيدنا محمد ﷺ هي خلاصة كل ده :«إن الله يحب أن يرى أثر نعمته على عبده ».

أثر النعمة بيبدأ من ملامحك ومن كلماتك ..تطبيق الحديث ده لوحده ، لو بقى هدف جوانا هيكون نقطة تحول في سكينة قلوبنا وفي درجات إيمانا بالله .

للمزيد من مقالات الكاتبة اضغط هنا